Uşaqlarda D vitamini çatışmazlığı

Hansı şikayətlərin arxasında dayanır

Çatışmazlıq özünü ayrıca bir “xəstəlik” kimi göstərmir: buna görə də çox vaxt gec tapılır. Qəbula gətirilən uşaqların şikayətləri adətən belə olur:

• baş ağrısı;
• əzələ və sümük ağrıları;
• yuxu pozğunluğu;
• iştahsızlıq və çəki problemi;
• tez yorulma, əzginlik, gündəlik aktivliyin azalması.

Bu siyahının hər maddəsinin başqa səbəbləri də var. Ona görə D vitamini “ehtimal” deyil, analizlə yoxlanılan göstəricidir.

Norma və rast gəldiyimiz göstəricilər

Normal göstərici 30–100 nq/ml referans aralığındadır. Praktikada isə bəzən çox kritik aşağı göstəricilərlə, 4,5–10,0 nq/ml aralığında rastlaşırıq. Bu səviyyə artıq təsadüfi profilaktik doza ilə deyil, hesablanmış müalicə dozası ilə idarə olunur.

Nə etmək olar

• Profilaktikanı ardıcıl aparmaq. Ən çox rast gəldiyimiz səbəb dozanın düzgün olmaması yox, requlyar verilməməsidir — “yada düşəndən düşənə”.
• Yaydan düzgün yararlanmaq. Günəşin ultrabənövşəyi şüalarından optimal istifadə: həddi aşmadan, günün ən isti saatlarından kənarda.
• Şübhə olanda ölçmək. Uzun sürən şikayətlərdə analiz nəticəsi təxminlərdən qat-qat faydalıdır.

Bu, təkcə uşaqlara aid deyil: eyni şikayətlərlə müraciət edən böyüklərdə də göstərici çox vaxt aşağı çıxır. Ailədə bir uşaqda çatışmazlıq tapılırsa, digərlərini də yoxlamağa dəyər.